رواية أميرة أخر الزمان للكاتبة ملك إبراهيم
ثم نظرت الى السماء تتحدث الى ربها.
- يارب انا مش عايزة حاجة من الدنيا غير انك تقف معايا، يارب انت حسبي ونعم الوكيل وكلتك امري يااارب
ثم وقفت من على الارض ووضعت بناتها فوق الفراش ووضعت الغطاء عليهم جيدًا ثم جلست بجوارهم فوق الفراش وهي تفكر في ما عليها فعله.
بعد ساعتين انتهى حفل الزفاف المقام امام المنزل واخذ جمال عروسته وصعد بها الى شقته بالاعلى وصعدت والدة جمال الى شقتها هي وشقيقتها واولاد شقيقتها وابنتها شاهندة وابنتها اماني وزوجها.
جلسوا جميعًا بصالة الشقة يتحدثون عن الحفل وكم كان رائعًا ويتحدث عنه الجميع.
جلس معهم فريد ابن شقيقتها الكبير والذي يبلغ من العمر 28 عامًا ويعمل محاميًا، نظر الى خالته وتحدث معها بغضب مكتوم.
- بس مكنش له لازمه الفرح وكل الهيصه الا حصلت دي يا خالتي وخصوصًا ان جمال مش اول مرة يتجوز وكمان مراته عايشة معاكم في نفس البيت يعني على الاقل كان يراعي شعورها
ثم اضاف بغضب.
- ثم انا لحد دلوقتي مش فاهم هو ليه اصلًا يتجوز على مراته وهو عنده بنتين لسه صغيرين
نظرت اليه والدته بغضب ثم تحدثت اليه بصرامة.
- فريد، ملناش دعوة بالكلام ده وابن خالتك هو ادرى بمصلحته
نظرت اليه خالته والدة جمال وتحدثت معه بغيظ.
- ايه يا سي فريد انت هتشتغل محامي علينا هنا ولا ايه ؟!
تحدث فريد بغضب.
- يا خالتي انا بقول كلمة حق وخصوصًا ان حضرتك عندك بنات واظن انك متتمنيش ان واحده فيهم يحصلها الا حصل مع مرات جمال
وقفت خالته بغضب تتحدث مع شقيقتها.
- عقلي ابنك يا عزة وعرفيه ان كل واحد يخليه في حاله
ثم اتجهت الى غرفتها وتركتهم.
نظرت والدة فريد الى ابنها وتحدثت معه بلوم.
- عجبك كده اديك زعلت خالتك
ثم وقفت وذهبت خلف شقيقتها حتى تراضيها ووقف الجميع خلفهم وتركوه يجلس بمفرده.
نظر فريد الى ساعة يده ثم نظر حوله قائلًا بملل.
- وانا مالي ما فعلا كل واحد حر ومراته ساكته وراضيه بكده يبقى انا الا هتكلم
ثم وقف هو الاخر وذهب لينام.
