" أظافرك يا آنسة " بقلم ندى الحداد
- ابتسم براحه، ياسين دايمًا ابتسامته بتكون بشوشة، هو جميل أوي: نقول الذِكر ده وهو: الصلاة والسلام عليكَ ياحبيبي يارسول الله أنتَ المستغاث بِكَ إلى حضرت الله تعالى، نقول الذِكر سبع مرات صباحًا ومساءً، هيزيدك قرب من الله وطاعة أكتر، هتكوني دايمًا جمب الله وحبيبه محمدﷺ، سبحان الله.
- ثواني ثواني هجيب النوتس بتاعتي وهدون كلامك ده، الله بجد.
جريت على أوضتنا واخدت النوتس من الكومودينو وخرجت.
- قعدت قصاده واخدت نفسي براحه وطلعته بنفس الراحه:
يلا كمل قولي على أذكار كتير أداوم عليها وعلى ذِكرها.
- حسبي الله لا إله إلاّ هو عليه توكلت وهو رب العرش العظيم، سبع مرات صباحًا ومساءً بردو، وتنفع حسبنا الله، وبردو عادي لو قولتي حسبي الله ونعم الوكيل.
- كتبت ورفعت راسي وانا بقول: بس حسبي الله ونعم الوكيل دي بتتقال لما حد يكون مظلوم.
- بإبتسامة البشوشة والمعتاده واللي بتاخد قلبي كالعادة:
لا، بتتقال فـ أى وقت، مش لازم إنك تكوني مظلومه أوي أى حاجه من اختراعات الناس دي، الإنسان الفاهم الواعي بيكون عارف هو بيقول إيه، حسبي الله ونعم الوكيل، انتي كده بتوكلي أمرك لله وبتسيبي الأمر لله عز وجل.
- كُنت خلصت كِتابه واتكلمت: قولي كمان إي أكتر ذِكر ربنا بيحبه.
- أكثر مايحب أن يسمع الله من عبده.
- حطيت سن القلم على الورقه وجهزت نفسي لأني أكتب: ايوة.
- سبحان الله والحمدلله ولا إله إلاّ الله والله أكبر ولا حول ولا قوة إلا بالله العلي العظيم، كلهم يتقالوا مَره واحده لأن الواو واو عطف.
- كتبت ورفعت راسي تاني وابتسمت: بكتُب ياعيوني كمل.
- الدرجة التانيه أو المرتبه التانيه، سبحان الله وبحمده سبحان الله العظيم.
- دول ولا في تاني.
- في كتير ركزي، الدرجة الثالثة أو المرتبه الثالثة: لا إله إلاّ الله والاجمل لا إله إلاّ الله محمد رسول الله، الدرجة الرابعة بقى أو المرتبه الرابعة: سبوحٍ قدوس رب الملائكةِ والروح.
- رفعت راسي عند التسبيح ده وابتسمت، أول مَره أسمعه:
ده تسبيح جميل، وأنت بتقول كُنت حاسة براحه شديدة تجاهه بجد.
