الدكتوره وكبير الحاره بقلم رحاب القاضي

حست انها متوتره ومكسوفه وفنفس الوقت مش عايزه تستسلم لاحساسها ده فسكتت..

خالد بحزن _
مقويه قلبك عليا اووي ي دكتوره نور..

ردت عليه وهي بتتهرب منه _
انا رايحه انام تصبح ع خير..

قفلت الموبيل فبص هو للشباك ولقاها فعلا طفت النور، فقال بدموع لمعت فعينه _
وانتي من اهل الخير ي احلي نور..

_قام هو كمان ورجع بيتهم واول مدخل البيت لقي باباه حامد العشري قاعد مستنيه وهو متعصب...

خالد _
خير ي حج اي اللي مصحيك لحد دلوقتي؟..

رد عليه حامد بعصبيه _
قاعد مستنيك، كنت فين لدلوقتي ي خالد؟..

ضحك خالد وقاله _
مش كبرت انا ع الاسئله دي، وبعدين ابنك كبير الحاره وموقفها ع رجل يعني متخافش عليه ي ابو خالد..

جه يدخل اوضته فزعق حامد بصوت عالي _
ياتارا ردت عليك الست الدكتوره اللي كنت قاعدلها تحت البيت ولا سابتك وطنشتك..

اتعصب خالد وقال _
حاجه تخصني انا وهي ي حج متشغلش بالك..

حامد _
مش هشغل بالي هي كلمتك ولا لا، بس هشغل بالي بانك هتتجوزها امتي؟..

خالد _
لما ربنا يأذن ي حج حامد..

حامد _
امتي برضو، اخواتك البنات اللي اصغر منك اتجوزو وبقي كل وحده معاها بدل العيل تلاته، صحابك كلهم اتجوزو وخلفو واخوك يوسف اللي اصغر منك بعشر سنين بندورله ع عروسه وهنجوزو قريب، انت بقي اي اللي يخليك. تقعد اكتر من كده وانت بقي عندك 33 سنه، ولا الهانم لسه مرضيتش عليك..

قرب خالد منه وقاله بهدوء _
لما نور توافق وتخلص جامعتها هتجوزها، انما افرض نفسي عليها واخليها تعيش معايا وهي مش موافقه مش هيحصل...

حامد بسخريه _
وهي ليها عين ترفض بعد مبقيت تصرف عليها وع اهلها وع ابوها العيان، ده حتي هدومها انت بتجيبهالها وبتصرف عليها  شقاك وهي فالكليه اهو وحده غيرها تتمنالك الرضا ترضي مش تتفرعن عليك..