بنت عمي1_بقلم رحاب القاضي

_عند كامليا كانت غيرت بدلت الرقص اللي كانت لابسه تحتها بدي كارينا بكم ولبست عبايه سمرا  ، وقلعت الباروكا بتاعت شعرها الحمرا وفكت شعرها الاسود الطويل ع ضهرها..

دخلت البنت اللي شغاله معاها وقالت: ي كوكي في تلات بهوات بره عايزينك..

كامليا: يادي النيله هو لؤي ده مش هيتلم غير لما افتح دماغه، مقولتله مليون مره مليش فجو الزباين ده، انا اخري ارقص وامشي،روحي ي بسمه قوليلو كوكي بتقولك حل عن دماغها عشان متقلبش المكان فوق دماغك..

بسمه: يس دول مش من زباين المحل دول ناس جديده وبيقولو عايزينك فحاجه شخصيه..

كامليا: ي نصيبتي ليكون المنيل جوز امي عامل مشكله مع حد، روحي ي بت دخليهم..

_طلعت بسمه عشان تدخل عزت واولاده وبدأت كامليا تشيل المكياج من ع وشها بالمناديل..

دخل عزت وعنيه دمعت وهو بيقول: نفس عيون ابوكي الخضرا تعالي فحضني ي حبيبتي..

وقفت كامليا وزعقت فيه: جاتك نيله طيب احترم شعرك الابيض ده ي حج، وبعدين انت فاكرني اي انا ااه رقاصه بس بشرفي..

مازن: واضح جدا والله من البادي الكارينا..

كامليا: انا لو عليا اقلعه ي اخويا بس دي وصية امي امشي ع نهجها وارقص باحترامي..

عزت: ناهد كانت بتقولك ترقصي باحترامك،ناهد اللي كانت مبتفوتش فرض ؟..

كامليا: ناهد مين ي حج، انا بتكلم عن فوزيه امي اللي اتبنتني من الملجأ وربتني هي والمنيل ع عينه جوزها فاروق،كانت رقاصه بس بأحترامها..

بصلها ادهم بقرف وقال: لا ونعم الاحترام بصراحه..

وبعدين شاور لباباه وقال: المهم عشان انا مش طايق المكان ده وعايز اخلص وامشي، الراجل ده يبقي يبقي عمك عزت السيوفي وانتي اسمك كامليا كمال السيوفي وانا والزفت ده ولاد عمك..

كامليا: وانا اي اللي يثبتلي كلامكم ده، ولو كلامكم صح جايين تدورو عليا بعد اي، بعد مانتو بقيتو بهوات وانا بقيت رقاصه؟..

عزت: يبنتي اللي حصل ده بسبب جدك مكنش بيحب امك ولما انتي اتولدتي ابوكي راح للي خلقه وجدك اخدك ورماكي فالشارع وطرد امك من البيت وامك حصلتلها حدثه وراحت هي كمان وانا قلبت الدنيا عليكي من ورا جدك اللي هو ابويا ولما اټوفي هو كمان برضو فضلت ادور لحد مروحت الملجأ اللي عملاه عيلت السيوفي وبالصدفه عرفت ان من عشرين سنه ابويا ودا بنت صغيره هناك وكان اسمها كامليا واتبنتك وحده اسمها فوزيه..