روايه أغنى فقيره _ سميه خالد
=فريدة ناقص كتير
-هما خمس دقايق وهنوصل
=يادي الخمس دقايق دول
رجلي وجعتني أوي مش شايفة لابسة كعب قد إيه ؟
-إقلعيه العربيات هناك ايه خلاص هنركب
=لا ثواني انتي عوزاني أقلع وأقعد حافيه ؟ انتي عارفه أنا صارفة قد ايه علي ضوافري دي ،كده ضوافري تبوظ وبرستيچي هيبقي في الأرض عاوزة الناس تقول "أم رجل حافيه أهي"
فريدة بصتلي بقرف وبدأت تقلدني وتعوج لسانها
-كده ضوافري تبوظ وبرستيچي هيبقي في الأرض عاوزة الناس تقول "أم رجل حافيه أهي" نينيني
=انا بعمل كده بتكلم بالطريقة دي !
-اه ويلا أطلعي الميكروباص قبل مايتملي
بصيت علي السلم
= ده طويل أوي
-أنا هطلع خليكي واقفة
طلعت فعلا وسابتني
*يلا اللي عايز مطرية ..مطرية نفرين مطرية مطرياااااا
قربت نحيته
=لو سمحت يا أنكل هو مفيش كرسي عشان اطلع العربية دي عالية عليا
_لو سمحت يا اي ؟
=يا أنكل هو مش حضرتك أنكل برضو
طلع خمسه جنيه من جيبه
_الله يسهلك يابنتي
=أنا مش شحاته صدقني
_أومال انتي اي ولا مين
إبتسمت ومدتله إيدي
=أنا ندي
مسح علي شعره وخبط إيديه الإتنين في بعض
منا لو مكنتش زعقت مع مراتي قبل ما أنزل مكانتش دعت عليا أدي دعواتها إستجابت
فريدة نزلت من العربية مسكت إيدي وقالتله
-معلش ياسطا دي معايا إفتكرتها طلعت ورايا هي بس مش متعودة تركب ميكروباص
=بصي قبل أي حاجة أنا اللي هقعد جمب الشباك
-لا يا ماما إنسي انا ممكن أفوتلك أي حاجة الا إنك متقعدنيش جمب الشباك
=انا علي طول كنت بقعد في عربية بابي جمب الشباك سبيني اقعد جمب الشباك بقي
خبطتت علي الشباك
-لا ياعسل دي مش عربية بابي ، دي عربية الشعب
=يعني مش هتقعديني جمب الشباك ؟
-لأ إنسي
*بعد مرور ربع ساعه*
= كنت متأكدة إني مش ههون عليكي وهتخليني أقعد جمب الشباك
-متتعوديش علي كده ده عشان أول مرة تركبي ميكروباص بس
يلا اللي مدفعش الأجرة يدفع
-الأجرة كام ياسطا
_النفر ب 6
-ليه كده كانت الإسبوع اللي فات ب 4
_البنزين غلي والدنيا غليت هنعمل ايه يعني يابنتي
فريدة طلعت 15
-طب معاك 2من 15 عايزين تلاته جنيه
=طب ماتديهاله كلها ده شكله راجل كيوت وغلبان وبعدين دول 3جنيه مش مبلغ يعني
-ال3جنيه دول ممكن نجيب بيهم ربع كيلو طماطم ، سندوتش فول ، نتصدق بيهم ليه قوليلي ليييه
=ليه ؟
-عشان أنا بشتغل وبقف علي رجلي 9سعات عشان أجيب الجنيه ده عشان كده أنا عارفة قيمته بجيبه بطلوع الروح
