زهرة قلب الربيع( 1 )بقلم فيروز عبدالله

أول ما قربنا منهم، حسيت بحد بيجرى عليا و سمعت صوت مستر يحيى وهو بيقول لراسل بضيق :  زهرة ! هاتها عن ايدك يا أخينا ! 
اتوترت جدا ، ولوهلة كنت هفتح عينى و هقوم أقف .. لكن لقيت راسل شد فى حضنة ليا ، وقال بنبرة استفزاز : هو حضرتك تبقى ابوها ؟ 
يحيى بارتباك لانة مكنتش متوقع الاجابة دى : لـ ... لا .. ، أنا فمقام اخوها الكبير ..

راسل بنفس النبرة : لا معلش دى امانة ، لازم اسلمها بإيدى لابوها .. 
"فى اللحظة دى ابتسمت وخبيت ابتسامتى فى حضنة ، و كنت عايزة اتعدل ،  ابوس دماغ راسل ، وادعى للى جابتة .. علشان مكنتش هستحمل أن مستر يحيى يلمسنى ! " 
فجأة سمعت صوت حد بينهج ، ونفسى اتكتم بعدها من حنان إلى حضنتنى جامد وهى بتبكى ، بابا جة وماما وراة .. متأكدة لو عصرتهم هينزل منهم اطنان قلق وخۏف .. 
بابا بسرعة مد ايدة علشان ياخدنى من راسل ،لكنى متزحزحتش من مكانى ! 
اتهبلت أنا باين لما ايدى مسكت فى ظهرة من ورا ، واعلنت رفضها عن مغادرة حضنة !

ضحك راسل وقال لبابا : ثوانى هعدلها .. عمل نفسة بيعدلنى علشان يدينى لبابا وهمس ليا بسرعة : فكى ايدك إلى محاصرانى يا زهرتى .. متقلقيش وعدك هيتنفذ قريب وهتبقى جنبى علطول .. ! 

فكيت ايدى بخجل شديد وأنا بشټم نفسى فى دماغى .. وبابا خدنى ، طبعا مش هذكر الامتنان إلى بابا كان فية لراسل ، ولا براعة راسل فى تركيب الأحداث على بعضها ، خلط الحقيقة بكذبتى الحمضانة ... شوية و كنت هقتنع أنا شخصيا بالى بيقولة وأشك فى الواقع ، اعترف أنة ممثل شاطر جدا ! 
*بعد شوية * 
اخيرا نايمة على سريرى .. والهدوء حواليا .. لاول مرة ضربات قلبى تنتظم بعد كمية الاضطرابات إلى حصلت فيومى .  . 
النور اتقاد ، دى اكيد حنان ، عرفتها من الارتباك فى خطواتها .. ايديها الرقيقة مسكت ايدى .. ثم صمت ، صمت طويل .. بعدة حسيت بشىء رطب على إيدى ، لا شك أن دى دموعها .. 
دموع كتيرة نزلت ، لابد أنها اختزنت كل دمعة فى يومها للحظة دى .. 
قالت بصوت مهزوز .." أنا آسفة يا زهرة .. الكلمات مش مساعدانى علشان اوفيكى حقك فى الاعتذار ، لكنى حقيقى آسفة بصدق ، مش عارفة أزاى كلمتك بالاسلوب دا ..