رواية أميرة أخر الزمان للكاتبة ملك إبراهيم

ابتسمت أميرة بتوتر وتحدثت والدة أميرة باحراج.

- اومال راندا فين ياختي عايزين نسلم عليها

خرجت راندا وهي ترتدي ملابسها للخروج وتعدل من طرحتها ترحب بهم.

- انا هنا اهو يا خالتي

ثم اقتربت من أميرة تتحدث معها بابتسامة.

- أميرة عاملة ايه وحشتيني

ابتسمت لها أميرة ثم تحدثت والدة أميرة مع راندا.

- أميرة كانت طالبه منك خدمة يا راندا

تحدثت راندا بتأكيد.
- من عينيا يا خالتي

تحدثت أميرة بخجل وهي تفرك بكف يديها.

- أنا يا راندا عندي بنتي جنه تعبانه وعندها مشكلة في القلب ولازمها عمليه وجوزي يعني..

توقفت أميرة عن الحديث ثم انهارت في البكاء وهي تشعر بالذل والقهرة.

وقفت راندا من مكانها سريعًا وجلست بجوارها تربت على ظهرها وتستمع الى حديث والدة أميرة وهي تكمل حديث ابنتها.

- الواطي جوزها منه لله اتجوز بالفلوس الا كانوا محوشينها عشان يعملوا عمليه للبت بنتها وأميرة دلوقتي بتدور على اي شغل عشان تجيب فلوس العملية لبنتها

نظرت راندا الى أميرة بحزن ثم تحدثت بفضول.

- طب وايه المساعدة الا اقدر اقدمها لأميرة يا خالتي

تحدثت أميرة وهي تبكي بانهيار.
- تشوفيلي اي شغل معاكي والنبي ياراندا انا مستعدة اعمل اي حاجة في الدنيا بس انقذ حياة بنتي

نظرت اليها راندا بحزن ثم ربتت على ظهرها وتحدثت بتأكيد.

- اهدي يا أميرة يا حبيبتي وان شاء الله هنلاقي حل

جففت أميرة دموعها وتحدثت وهي تنظر الى طفلتها جنه.

- انا مستعدة اشتغل اي شغلانه، بس اقدر اوفر لبنتي حق العملية في اسرع وقت

حركت راندا رأسها بالايجاب وتحدثت بتأكيد.

- حاضر يا أميرة، انا هشوفلك شغل معايا

ثم اضافة بهدوء.
- بكرة ان شاءالله هستناكي الساعة 7 الصبح هنا ونروح الشغل مع بعض وانا هفهمك في الطريق كل حاجة عن الشغل