حكاوي مراد وجهاد بقلم جهاد عبدالعال
_عمري ما صدقتهم في حرف قالوه ليا، ولا نظرتهم ولا نبرة صوتهم، لكن أنا مكنتش أقدر أعترض معنديش الطاقة ولا القدرة إني أقف قدام واحد فيهم.
-أنتِ لأزم تروحي لدكتور حالًا، حالتك مينفعش نتأخر عنها.
_مراد عنده حق يابنتي لأزم نطمن عليكِ.
_المهم أنا هعمل أي، وهروح فين؟
_أنتِ هنا في بيتك وهتفضلي هنا، متشغليش بالك بكل اللي جاي، المهم دلوقتي تقومي تغيري هدومك دي علشان ننزل نروح لدكتور.
قالت كلامها وأنسحبت من وسطنا دخلت أوضتي، كنت باصص على طيفها بحزن، حالتها سيئة جدًا من أول ما شفتها شكيت أنها أكيد تعبانه، أيديها الزرقة وشفايفها تحت عيونها كل دي علامات واضحه لمريض القلب، المحزن أكتر أنها مش بس مريضة لا وبتعاني في حياتها الغير أدمية بالمرة، خدت نفس طويل وبصيت على بابا اللي حاوط وشه بكفوفه والهم واضح عليه، أتكلمت وأنا بحاول أهون كل اللي بيحصل دا.
_طول عمري بحبها، كنت بتمنى أخلف بنت زيها، يمكن عمرك ما شفتها لكن أنا كنت بزورهم دايمًا، كانت وردة بتضحك دايمًا وجميلة بشكل يلفت القلب، كأنهم زرعوها في
تربة غير تربتها، دبلت وبتموت، عمك عبدالرحمن مخلفش غيرها زي ما أنا مخلفتش غيرك، عمك كان عاقل وغير باقي أهله ربى بنته كويس وعلمها، كان بيحبها أوي كان بيعاملها كأنها أميرة من كتر حبه فيها، قلبي أتكسر وأنا شايفها كدا، للحظة معرفتهاش بسبب شكلها اللي أتغير، بهتت وقلبها أتفتت.
-خلاص هي بقيت هنا، إن شاء الله هتبقى بخير ومفيش أذى هيصيبها طول ما هي جمبك.
_يارب يا مراد أقدر أعوضها عن كل المُر اللي شافته.
خرجت من الأوضة فقررت أنسحب من بينهم لأني حاسس أنها عايزه تتكلم مع بابا لوحدهم.
